Inamdar Shree Devi Bhagwati Kotkamte

देशभरातील इतर व्यक्तिगत इनामे आणि संस्थाने जरी रद्द झाली असली तरी देवगड तालुक्यातील कोटकामते गावचे इनाम मात्र अजूनही चालू आहे. या गावाच्या सर्व जमिनीवर प्रमुख कब्जेदार म्हणून इनामदार ‘श्रीदेवी भगवती संस्थान कोटकामते’ असा शिक्का प्रत्येक जमिनीच्या ७/१२ च्या उताऱ्यावर आहे.
या गावात भुईकोट किल्ला आहे.  यावरूनच गावाला 'कोटकामते' असे नाव पडले. छत्रपती शिवाजी महाराजांचे आरमार प्रमुख सरखेल कान्होजी आंग्रे यांनी कोटकामते गावातील भगवती देवीस नवस केला होता, ‘जर मी लढाईत विजयी झालो तर, तुझे भव्य देऊळ बांधीन व देवस्थानाला गाव इनाम म्हणून देईन’ त्याप्रमाणे युध्द जिंकल्यावर कांन्होजींनी शके १६४७ म्हणजेच इ.स. १७२५ साली या मंदिराचा जीर्णोद्धार केला होता.
आश्विन शुद्ध प्रतिपदा ते आश्विन शुद्ध दशमी, अर्थात विजयादशमी पर्यंत येथे शारदीय नवरात्रौत्सव मोठया भक्तिभावाने साजरा केला जातो. नवरात्रौत्सव हा गावाचा सर्वात मोठा वार्षिक उत्सव आहे. आई भगवतीचा नऊ दिवस जागर केला जातो. या उत्सवाला जिल्ह्यातील भाविकही मोठ्याप्रमाणात दर्शनाला येतात. या दिवसात चाकरमानी मंडळी गावात पोहोचतातच.