Літаратурны музей Петруся Броўкі

Пятрусь Броўка – сын складанай эпохі, што ўвабрала ў сябе стварэнне і разбурэнне, надзеі і расчараванне. Яго жыццё можна разглядаць як праекцыю бытнасці цэлага пакалення не толькі беларусаў, але і іншых народаў-суседзяў, якія воляю лёсу падзялілі складаны паварот еўрапейскай гісторыі. Ад вясковага пастуха – да старшыні сельскага савета, ад рэдактара газеты – да кіраўніка Саюза беларускіх пісьменнікаў. Высокія званні і прызнанне грамадзянскіх заслуг... Што ёсць квінтэсенцыя паэтычнага шчасця? Пятрусь Броўка бачыў сваё шчасце ў працы, у неспатольнай смазе стварэння, у адчуванні крокаў эпохі. Паэзія Петруся Броўкі — гуманістычная па змесце і акрыленая па духу. Часам наіўная і рамантычная, але заўсёды шчырая. Такая, які ён быў сам.